वीर गणेशमान ‘१० के’ रोड रेसको उपाधि सेनाका राजन र धादिङकी सन्तोषीलाई

काठमाडौं– पाँचौँ वीर गणेशमान सिंह १० किलोमिटर (१० के) सडक दौडको उपाधि पुरुषतर्फ नेपाली सेनाका राजन रोकाया र महिलातर्फ धादिङकी सन्तोषी श्रेष्ठले जितेका छन् ।

गणेशमान सिंह फाउन्डेसन र वीर गणेशमान सिंह स्पोर्ट्स कमिटीको आयोजनामा शनिबार बिहान सम्पन्न प्रतिस्पर्धामा रोकायाले ३१ मिनेट २२ सेकेन्ड र श्रेष्ठले ३८ मिनेट ३ सेकेन्डमा दौड पूरा गरेका थिए ।

प्रतियोगितामा पुरूषतर्फ सेनाकै खडकबहादुर खड्काले (३१ मिनेट ३५ सेकेन्ड) दोस्रो र मुकेशबहादुर पाल (३२ मिनेट १२ सेकेन्ड) तेस्रो भए । केन्याका जुलियस मुरिओकीले सान्त्वना स्थान हासिल गरे ।

यस्तै, महिलातर्फ नेपाली सेनाकी पूर्णलक्ष्मी न्यौपाने दोस्रो (३९ मिनेट १९ सेकेन्ड), सशस्त्र प्रहरीकी आशा रावत तेस्रो (४० मिनेट २७ सेकेन्ड) र फूलमती रानाले सान्त्वना स्थान हासिल गरिन् । 

दरबारमार्गबाट सुरु भएको दौड भद्रकाली, रत्नपार्क, जमल, दरबारमार्ग, केशर महल, लैनचौर, लाजिम्पाट, महाराजगन्ज, बालुवाटार, नक्साल, जय नेपाल हल हुँदै पुनः दरबारमार्गमा पुगेर टुङ्गिएको थियो ।

प्रतियोगितामा तीनवटा विभागीय टोली, विभिन्न संघ संस्था, स्कुल, कलेज, केही विदेशी खेलाडी गरि झन्डै ५ सय खेलाडीको सहभागिता थियो ।

प्रतियोगितामा १० किलोमिटर दौडमा महिला तथा पुरुष विजेताले समान ६० हजार, दोस्रोले ३० हजार, तेस्रोले १५ हजार, चौथोले १० हजार र पाँचौले ५ हजार रुपैयाँ प्राप्त गरेका छन् ।

उपप्रधानमन्त्री एवम् शहरी विकास मन्त्री प्रकाशमान सिंह र कर्णाली प्रदेशका अर्थमन्त्री राजिवविक्रम शाह, मङ्गलादेवी फाउन्डेसनकी अध्यक्ष सिर्जना सिंहसहितले विजेता खेलाडीलाई प्रमाणपत्र र मेडल हस्तान्तरण गरेका थिए ।