निप्पन र युएस स्टिलको सहकार्य : ७० हजारले रोजगारी पाउने

वाशिङ्टन – अमेरिकी राष्ट्रपति डोनाल्ड ट्रम्पले निप्पन स्टिल र युएस स्टिलबीच सहकार्य हुने बताएका छन्। उनले सामाजिक सञ्जालमार्फत सो कुराको जानकारी गराउँदै यसको राजधानी पिटरबर्गमा रहने बताए। यसले अमेरिकी अर्थतन्त्रमा थप १४ अर्ब अमेरिकी डलर लगानी हुने तथा ७० हजार रोजगारीको बाटो खुल्ने उनको भनाइ छ।

ट्रम्पले अर्को साता स्टिल प्लान्टको भ्रमण गर्ने छन्। यो सम्झौता पहिलो पटक सन् २०२३ को डिसेम्बरमा भएको थियो। सो समयदेखि विभिन्न आन्तरिक तथा बाह्य राजनीतिका कारण विवाद भने आइरहेको थियो। ट्रम्पले अमेरिकी स्टिल विदेशी कम्पनीको निगरानीमा नरहने बताउँदै आफ्नै लगानी हुने बताए।

अप्रिल महिनामा अमेरिकामा विदेशी कम्पनी भित्रिएपछि सुरक्षामा असर गर्ने भन्दै ट्रम्प प्रशासनमा उजुरी परेको थियो। बुधवार नै रोयटर्सले अमेरिकामा निप्पन स्टिलले १४ अर्ब अमेरिकी डलर लगानी गर्ने जनाएको थियो। यसमा चार अर्ब अमेरिकी डलर नयाँ मिल बनाउनका लागि भएको समेत उल्लेख थियो।

सन् १९०१ मा स्थापित युएस स्टिल अमेरिकामा आर्थिक र औद्योगिक विकासको एउटा बिम्ब नै मानिन्छ । यो एक अर्ब अमेरिकी डलर सम्पत्ति हुने विश्वकै पहिलो उद्योग भएको जनाइन्छ। दोस्रो विश्व युद्धपछिको समयमा भने यसको प्रभाव घटेको छ। यो अमेरिकाको सबै भन्दा ठुलो स्टिल कम्पनी रहन सकेन। यसमा १४ हजार कामदार छन्। यी मध्यका ११ हजार मजदुर सङ्गठनका सदस्य छन्।

अमेरिकी स्टिलले शुक्रबार नै राष्ट्रपति ट्रम्पलाई बोल्ड तथा महान् नेता भन्दै अमेरिकामा नै धेरै लगानी भित्रिएर युएस स्टिल फेरि संसारको पायनियर उद्योग बन्ने सम्भावना रहेको बताएको छ।