वेस्ट इन्डिजविरुद्ध आयरल्यान्डको फराकिलो जित

काठमाडौं – आयरल्यान्डले वेस्ट इन्डिजसँगको एक दिवसीय खेलमा फराकिलो अन्तरको जित हात पारेको छ।

डबलिनमा बुधबार भएको दिवा रात्रि खेलमा आयरल्यान्ड १२४ रनले विजयी भएको हो। आयरल्यान्डले दिएको ३०४ रनको लक्ष्य पछ्याएको वेस्ट इन्डिज ३४.१ ओभरमा सम्पूर्ण विकेट गुमाउँदै १७९ रनमा अल आउट भएको हो।

वेस्ट इन्डिजका लागि सातौँ क्रमका ब्याट्सम्यान रोस्टन चोजले सर्वाधिक ५५ तथा आठौँ क्रमका म्याथ फोर्डले ३८ रन प्रहार गरे। वेस्ट इन्डिजले ३१ रनमा ६ तथा ७१ रनमा ६ विकेट गुमाएको थियो। जस्टिन ग्रेभ्सले १७ बलमा ३५ रन जोडे।

वेस्ट इन्डिजलाई सस्तोमा समेट्ने क्रममा बेरी म्याकर्थीले ७।.१ ओभरमा ३४ रन खर्चेर चार विकेट लिए। जर्ज डोकरेलले दुई ओभरमा २१ रन खर्चेर दुई विकेट लिए।

यसअघि टस हारेर पहिले ब्याटिङ गरेको आयरल्यान्डले ६ विकेटको क्षतिमा ३०३ रन जोडेको हो। आयरल्यान्डका लागि एन्डी बलबराइनले ११२ रनको योगदान गरे। यसै गरी, पाउल स्टरलिङले ५४ तथा हेरी टेकरले ५६ रन जोडे। लोरकान टकरले १८ बलमा ३० रन जोडे ।